المقالات

الضغط النفسي ...

الضغط النفسي لما بياخدك لدايرته، بيشلّ حركة الحياة جوّاك ..

بتكون واقع تحت ضغطين

▪️آلام في الماضي خايف تتكرر في الحاضر

▪️ومخاوف من المستقبل واللي هيحصل فيه

 عندك توقعات للمستقبل شايف إنك مش هترضى ولا هتتبسط مهما كان حواليك من نِعم غير لو حصل اللي في بالك زي ما أنت مخططله

أو بتفكّر كتير في أي حاجة وفي كل حاجة

 وعندك شعور دايمًا بان في حاجة نقصاك

بتحس إنك مشحون، مخزون هدوئك مُنتهي

كل حاجة كان ممكن تمرّ بتيجي عند قلبك وتاخد وقع أكبر من حجمها بكتير

عندك إحساس دائم بإنك محتاج تسيطر على اللي حواليك

محتاج تعمل أي حاجة تطمنك ان الألم اللي عشته في الماضي مش هيتكرر في الحاضر

ومحتاج تأمن مستقبلك وتطمن ان اللي جاي مش هيحصل فيه حاجة أنت مش عايزها

وده شىء مستحيل

الحياة مفيهاش ضمانات لاي حاجة

وكل ما هو براك ده خارج دايرة تحكُمك

فطول ما أنت بتحاول تتحكم في اللي مالكش عليه سيطرة

بتفقد الحاجة الوحيدة اللي تقدر تُديرها

وهي نفسك وأفكارك ومشاعرك

8 خطوات للتغلب على الضغط النفسي

1️⃣ النوم الجيد

لازم تكون فترة النوم من 7 ل 8 ساعات

ويكون في طقوس قبل النوم بتساعدك على الاسترخاء (وضوء_استغفار)

عشان لو عقلك مافصلش أثناء النوم ده سبب قوي انك تكمل يومك مضغوط وتعبان

2️⃣ الصحيان بدري

تبدأ اليوم من أوله وتصلي الفجر ده بيخلي تركيزك أعلى وانتاجيتك في الوقت ده من اليوم بتكون أفضل حاجة لان ذهنك بيكون صافي وماتعرضتش لاي مواقف شتت تركيزك فقدرتك على التحصيل هتكون عالية جداً

3️⃣ تقليل استخدام وسائل التواصل الاجتماعي

لانها دايما بتدخلك في حالة من المقارنات أو الأخبار والأفكار الي بتملاك مشاعر سلبية

غير انها بتسرق وقتك وده ممكن يراكم عليك مسؤوليات فيزيد احساسك بالضغط

4️⃣ ممارسه الرياضه

بتساعد جدا في تفريغ الضغط العصبي وبتهدي كتير من الانفعالات

5️⃣ التحدث مع كبار السن والأطفال

ده بيخليك تخرج من نطاق تفكيرك الداخلي الضيق لنطاق أوسع وأعمق

ولما بتعمل ده بنية برّ أو جبر خاطر

العطاء اللي بتقدمه ليهم لإسعادهم هيسعدك أنت الأول وده هيهدي كتير من مشاعر الضغط والتوتر

6️⃣ كتابة الخواطر لتفريغ المشاعر السلبيه

الكتابة بتساعد على تخفيف حدة الزحمة من ضغط المشاعر والأفكار المخزنة جواك

وبيخليك قادر تحليلها وغالباً هتلاقي الحل وإجابة السؤال اللي شغلك في كلامك

7️⃣ اتباع نظام غذائي صحي

قلة شرب المياة او استخدام الوجبات السريعة والأكل غير الصحي ده بيقلل مواد أساسية الجسم محتاجها

وده بيقلل من التركيز وببزود حالة الإرهاق الجسدي وببزود الضغط

وبالتالي اتباع نظام صحي هيقلل جدا من حدة الضغط النفسي

8️⃣ الصلاة والذكر و التسبيح

الصلة بالله بتزود من الشعور بالراحة والسكينة

والقدرة على التسليم وبالتالي هيكون في شعور أكبر بالسلام والرضا

كل يوم بتعيشه هو هدية من ربنا ماتضيعهوش على حسرة على الماضي ولا قلق من المستقبل

عش حياتك ولا ترهق نفسك بكثرة التفكير

فالله عنده حسن التدبير..

ايه الحاجة اللي بتعملوها وبتقلل من احساسكم بالضغط النفسي؟