المقالات

"لا تُضيق واسع "

الحياة مجموعة من المعاني والمشاعر والمواقف والآراء المختلفة

احنا نفسنا كبشر مالناش قوالب مُحددة ينفع نتقسم ليها

احنا اللي بنحطنا في قوالب ...

الطيب والشرير

والاجتماعي والانطوائي

والعاطفي والعقلاني

مع اننا في الأصل كلنا مزيج من كل ده ..فينا المعنى وضده!

الحياة ومعانيها واسعة

حتى الرزق مالهوش طريق واحد،الشرط الوحيد للرزق هو السعي

في اتساع المعانى رحمة 🤍

ومن أجمل الآيات اللي بتشمل سعة المعنى

{لِيُنفِقْ ذُو سَعَةٍ مِّن سَعَتِهِ}

حتى الإنفاق مش مربوط بالشكل المادي احنا اللي حطناه كشرط للإنفاق

ربنا فتح لنا باب الإنفاق حسب طاقتنا واختلافتنا وقدرتنا

لو سعتك في الكلمة الطيبة انفق منها

لو سعتك في المساعدة قدمها

لو سعتك في اسداء المشورة قدم وقتك ورؤيتك للي محتاجها

لو سعتك في الصبر والتغافل والتسامح خليك الشخص الهين اللين الرحيم بقلوب الناس

لك مساحة وطاقة.. وعليك السعي بسِعه

مهمتك بذل الوسع..

مفيش حد بيحاول وبيجيب صفر!

السعي بيوجب حتمية الوصول

والوصول مش شرط أبداً يكون للحاجة اللي احنا عايزنها

[وَأَن لَّيْسَ لِلْإِنسَانِ إِلَّا مَا سَعَيٰ وَأَنَّ سَعْيَهُ سَوْفَ يُرَيٰ ثُمَّ يُجْزَاهُ الْجَزَاءَ الْأَوْفَيٰ]🤍.

الجزاء الأوفى ده وعد من ربنا إنك هتوصل لأفضل حاجة مناسبة لسعيك ولحياتك

احنا بردة اللي ضيقناها على نفسنا وحطينا شرط الوصول انه يكون للمكان اللي احنا شايفينه مناسب وعلى مزاجنا

السعي هيعمل حاجة من التلاتة..

✔️يا أما هتنجح وتوصل للي أنت عايزه

✔️يا أما مش هتوصل بس هيديك خبرة في اللي جاي.

✔️ يا أما هيخليك تتعلم أن مش دا الطريق اللي يستحق المجهود فتشوف طريق تاني غيره.

مفيش مجهود بيضيع أبداً

‏"لنا حق التمنّي، وهمة السعي، وبذل الوسع وحُسن الظن .. ولله سرُ التوقيت، وسرُ الإجابة، وسرُ الدهشة".