المقالات

إزاي يبقى عندك القدرة إنك تشوف المِنحة جوه المِحنه؟!

وازاي توصل للرسالة  والحكمة اللي ورا الإبتلاء او الألم اللي بتمر بيه؟!

كلٌ منّا مُبتلى في شيء

‏فالحياة لمّ تصف لأحدٍ

بس كل واحد شايف الدنيا بعين مختلفة

في اللي عينه شايفه اللطف في أشد لحظات الإبتلاء

وفي اللي عينه مش شايفه غير المفقود وسط كل النِعم الموجودة

عايش حياته ناقم وغضبان وحزين..

القدرة انك تقدر تشوف الخير في الشر

واليسر اللي مُصاحب لكل عُسر

له 5 فوايد

✅ هتكون شخص مُتفائل والناس هتحب صُحبتك

✅ قدرة أعلى على تحمل الآلام والتحديات

✅ هتكبر في السن بشكل صحي على مستوى التفسي والعقلي والبدني

✅ هتبقى اقل عُرضه للاكتئاب والأمراض النفسية

✅فرصك في النجاح على المستوى الشخصي هتكون أعلى

20 طريقة تساعدك إنك تشوف المِنحة في المِحنة

🔺 التفاؤل فن تصنعه

عشان تبقي مُتفائل لازم تقرأ وتتعلم عن التفاؤل المُكتسب

تشوف الناس الناجحة والمُتفائلة بتعمل إيه وتقرأ عن سيرتهم

وتشوف الحاجات اللي عملوها وتطبقها

🔺التعاطف هو أكسير الرفاهية النفسيه

التعاطف مع الاخرين بقلب وتمني الخير للناس

التعاطف بيخرجك من حيز نفسك وأفكارك بيعلمك ان الدنيا فيها حاجات كتير مش هتقدر تتعلمها غير برحمتك بقلوب الناس مش هتلاقيها أبداً في كتب ودراسات

في حاجات مش هتتعلمها غير بالمعايشة والتجربة

🔺 الأعمال الخدمية

روح دار مسنين او ملجأ ايتام

تقديمك من وقتك وجهدك لإسعاد غيرك بيسعدك أكتر منهم

القدرة على المَنح أفضل من العطاء

لإن العطاء عطاء المادة.. والمَنح مَنح الروح

🔺 الامتنان

هو مفتاح الراحة والطريق إلى السّلامة..

الامتنان بيعلمك تعرف قيمة كل نِعمة في حياتك والحاجة اللي بتركز عليها بتزيد

فهتركز على النعمة هتزيد

ده هيخليك حتى لو مريت بإبتلاء هتشوف النعمة جوه الإبتلاء

لا يزال العبد بخير ما تقلب بين ذِكْرٍ وشكر فاللهم أعنّا على ذكرك وشكرك وحسن عبادتك

🔺تقبل ان أحياناً النجاة بتكون في المنع

وان مش كل العطايا نِعم

أحيانا بيكون الرزق ابتلاء

كلامك مع نفسك وحوارك الداخلي

في الأوقات دي بيكون ازاي

يا ترى قادر تشوف نجاحاتك السابقة؟

عارف ان مفيش مقايس للنجاح

احنا اللي اخترعناها وألزمنا نفسنا بيها

لما بتدخل امتحان وتجيب 40 من 50 بتقول نقصت 10 درجات ازاي!

مابتقولش جبت ال 40 درجة دول ازاي؟!

خلي عينك تشوف نجاحاتك واشتغل على زيادتها

الشكر للسعي لا للنتيجة

🔺 أسأل نفسك عن نيتك

وأسأل نفسك عن الأفكار اللي في دماغك صح ولا انت بتتوقع؟  ولا عامل تعميم للمشاعر والمواقف السلبية ولامركز علي الوحش بس وسايب النعم الكتير

شغل دماغك علي نفسك مش علي الناس

أحسن الظن وحاول تشوف زوايا تانيه للمشهد

🔺 التغافل 

استيعابك أن الدُنيا فانية بيخليك هادي جدًا عارف ان مش كل حاجة تستحق منك ردة فعل  وبتقن التغافل والتغاضي تجاه الكثير من الأشياء

"مازال التغافل من فعل الكرام " الحسن البصري

التغافل بيفيدك أنت أولاً

بتكون كريم في تعاملاتك، هين، لين، سهل

كمان بيخليك تقدر توصل لراحة البال لما تعرف ان مش كل حاجة لازم تركز فيها وتبذل فيها مجهود

«تسعة أعشار العافية في التغافل عن الزلات» الإمام ابن حنبل

🔺 حط لنفسك حاجة حلوة كمكافأة

بعد فترات الضغط أو الزحمة في الشغل لما بتكون عارف ان في حاجة حلوة ده بيساعدك تكمل بطاقة وصبر ومثابرة

🔺 أهلاً بالتحديات

أقبل وجود التحديات في حياتك وخلي تركيزك على سؤال

الإبتلاء أو التحدي ده جاي يعلمك ايه؟

طلاما السؤال في دماغك هتقدر توصل للحكمة بشكل او بآخر

وخلي دايما في بالك

"لا اجتباء بلا ابتلاء".

الانسان عشان يُمكّن او يبقي له مكانة معينه لازم يمر بفترة ابتلاء وإعداد

🔺 افتكر نجاحاتك السابقة

المحن اللي مريت بيها وعديت منها

والوقعات اللي كنت شايفها نهاية الدنيا وعدت بلطف ربنا ورحمته ومعيته

افتكر كل مرة قولت لنفسك مش هتعدي وعدت

وطلعت منها أفضل واقوي واتعلمت حاجة مكنتش هتتعلمها إلا بالإبتلاء والمشكلة اللي حصلت دي

🔺 لازم يكون ليك قدوة أو شخص تثق في رأيه

شخص عنده حكمة في التعاملات والتصرفات يكون بيلهمك وبيشجعك إنك تكوني احسن في الحياة

🔺 ابدأ تطبيق اللي تعلمته من الشخص اللي بيمثلك نموذج لإنسان جيد وإيجابي في حياتك

عشان تكون أنت كمان نموذج وقدوة إيجابية في حياة الناس اللي حواليك أهلك وأصحابك

🔺 حياتك مش صدفة كل شئ بيحصل بقدر

فبلاش تدخل نفسك في دوامة من الافتراضات السيئة والتساؤلات

لو كنت عملت كذا ماكنش حصل كذا

قال رسول الله عليه الصلاة والسلام:

"إن أصابك شيء فلا تقل لو أني فعلت كان كذا وكذا ولكن قل قدر الله وما شاء فعل فإن لو تفتح عمل الشيطان"

استبدلها بالتفكير في الحلول

ايه اللي تقدر تعمله عشان تغيرالمشهد الحالي

ركز على الحلول مش علي المشاكل

🔺 تجنب الزعل والغضب الزايد عن اللزوم 

لان تبعات الوضع ده بيخليك تفقد حقك عشان أنت بشكل ما بتكون تجاوزت في الكلام وقت غضبك أو بيكون رد فعلك مبالغ فيه

فهتلاقي اللي حواليك كلهم بيغلطوك

ماتستسهلش الزعيق أو الغضب لإنه بيخسّرك حقك وبيخسّرك كتير على مستوى علاقاتك أو صحتك النفسية

🔺 أعرف مواطن الألم والضعف والأماكن اللي اللمس البسيط فيها جواك بكلمة او موقف بيعصبك بيخلّيك تخرج عن طبيعتك وهدوئك

وابدأ خد خطوات تهدّيك ّ

مثلاً التأمل والذكر والاستغفار

أو تسمع آيات السكينة 

لما تعمل ده بشكل يومى هتكون أهدى كتير وهيكون صعب ان حد يقدر بستفزك في الكلام فتتعصب ويغلطك

وهيخلي دايمًا رد فعلك هادي ومتزن وحكيم

🔺الكلام بشكل إيجابي مع نفسك عن نفسك

أنا هقدر أعمل كذا ان شاء الله

أنا زوجة كويسه

أنا صاحب جدع

وخلي ده في دعائك إن ربنا يُعينك تكون انسان كويس  وصاحب جدع وابن بار

"لا يوجد انسان ضعيف بل يوجد انسان يجهل موطن قوته"

🔺 التسامح

حاول تسامح حد اذاك ومش عارف تسامحه

لو عايز تحسن لنفسك يبقى لازم تتعلم تسامح 

(التسامح من زينة الفضائل)

هتحس ان حِمل واتزاح من على قلبك

التسامح هو مفتاح الراحة والحرية.

🔺 السعادة قرار

اعمل قايمة بالحاجات اللي بتخليك مبسوط

اي وقت تحس بمشاعر سلبية افتح القايمة وابدأ نفذ حاجة منها

أتكلم مع حد بتحبه أو أخرج معاه

ابحث عن السعادة كل لحظة، لو لم تجدها خارجك اصنعها داخلك

🔺 مارس عادات صحية يوميًا

اقعد في الشمس الصبح

كل أكل صحي

اتمشى نص ساعة يوميا

اقرا كل يوم آيات قرآن بتركيز

فعل عادات إيجابية تساعدك ان عينك دايمًا تلقط الحلو في وسط الكتير العادي

هتلاقي نفسك بتستمتع بتفاصيل الجمال والراحة والسعادة في كل حاجة حواليك قد تبدو لغيرك عادية وهي بالنسبالك كل الجمال

🔺 أسأل نفسك ايه أفضل شكل تحب تكون عليه في يوم؟

وفكر ازاي تقدر تعمل ده؟

مثلاً

افضل شكل ليك وانت حاطط ربنا في حسبتك في اي موضوع وانت بتتعلم وبتعرف عن ربنا أكتر

افضل شكل ليك وانت بتضحك وبتضحك الناس

وانت بتحاول تخلي قلبك سليم

 وأعمل خطوات تساعدك على تنفيذ ده..

الناس في السكينة سواء، فإن جاءت المحن تباينوا. - ابن خلدون

هتدّي نفسك كام من 20 في قدرتك كشخص على رؤية المِنح في داخل المُحن؟

ايه الحاجات اللي هتبدأو في تنفيذها عشان تساعدكم في رؤية الحكمة اللي ورا اي تحدي في حياتكم؟