المقالات

10 علامات جرس انذار لصحتنا النفسية 

كلنا بنمر بفترات لخبطة أو ضغط أو تعب وده بيعملنا حالة من عدم الاتزان بتبان بأكتر من طريقة 

الطبيعي إن العلامات دي بتظهر فترة وتروح

لكن لو العلامات دي مكمله ومُستمرة معاك يبقى لازم تخلي بالك 

1️⃣ فقدان الشغف 

حالة من فقد الشغف في أقل الممارسات 

مفيش شغف ناحية اي حد ولا اي حاجة 

ممكن ده يحصلنا في فترة نتيجة موقف أو حدث جد علينا لكن لو أستمر وده بقي الطبيعي بتاعنا ده يدينا انذار إن في حاجة مش مظبوطة

الحل إننا نلجأ لمختص يساعدنا في تجاوز الحالة دي 

2️⃣شعور الكركبة والدوشة 

احساس  إن الدنيا كلها مكركبه فوق دماغك كل تفاصيل الشغل والبيت اللي كنت بتقدر تعملها بقى احساسك إنها تقيله عليك وإنك مش ملاحق وهو مفيش إلا أنا !

ده ممكن يحصل عادي في فترة نتيجة ضغط  خارجي بتمر بيه لكن لو أستمر 

يبقي معناه إن في حالة من تزاحم المشاعر والأفكار جواك هي الي ساحبه طاقتك و محسساك بالدوشة 

الحل انك تفضي الدوشه الي في دماغك دي  بالكتابه 

ناس كتير بتستصعب فكرة الكتابة أو التفريغ عن طريق الكتابة 

لكن أوقات كتير بتبقي الزحمة اللي جواك مش قادر تحكيها لحد فمجرد ما تفرغها بينك وبين نفسك هتلاقي نفسك اهدى..

وممكن تعملي meditation 

عن طريق إنك تركز في نقطة تركيز واحدة وتاخد نفس عميق يوصل للبطن و تخرّجه برّاحه أكتر من مرة لحد ما تحس إنك أهدى 

3️⃣ اعتزال الناس 

شعور عدم الرغبة في التواجد أو الإقتراب من الناس كلها بتبقى شايف إنك مش خسران حاجة لو بعدت عنهم

طبعًا ده بعيد خالص عن فكرة انك تكوني شخص بيميل للإنطوائية أو إنك بتحتاج تفصل فترات بسيطة لوحدك

لكن الاعتزال هنا بيكون رغبة في الاعتزال الكامل والتعامل بيكون في حالات الضرورة بس

 4️⃣اضطرابات في النوم 

مفيش جدول معين لمواعيد النوم والصحيان 

ممكن تنام فترات طويلة جداً بشكل غريب أو ماتنامش خالص

5️⃣ شعور بالإستنزاف

بتصحي بعد نوم فترات طويلة جواك شعور بإنك كنت بتحارب مش نايم

صاحي حاسس بتعب وإن طاقتك مسحوبة ومستنزف 

6️⃣ شعور بفقدان الطاقة 

علي مدار اليوم 

  بيزيد و بيستمر طول اليوم بتصحى مقريف وبتكمل يومك كده بدون اي سبب جدّ خلال اليوم 

7️⃣ التشتت

علطول حاسس إنك مش قادر تركز في اي حاجة بتعملها 

مشاعرك علي صفيح ساخن طول الوقت اي حاجة ممكن تستفزك وتخرجك عن السيطرة وتغضب

حتي في الكلام بتحس إنك مش عارف تجمع كلامك ولا أفكارك 

الحل إنك تركز علي جواك تبدأ تفهم مشاعرك وأفكارك 

ليه حسيت كذا في الموقف الفلاني 

ليه اتعصب لما قابلت فلان

ليه اتوجعت لما اتقالك الكلمه الفلانيه 

تحس بمشاعرك و تفهم أسبابها ...

8️⃣ فقدان التركيز

لما بتبدأ حاجة مابتقدرش تكملها

صعب تصب تركيزك في حاجة معينة 

لو بدأت تقرأ كتاب  أوبتسمع حاجة مش بتكملها

الحل انك تدي شوية اهتمام  لنفسك عشان عقلك يقدر يقوم معاك ويركز 

زي العربية لو محطناش فيها بنزين مش هتتحرك 

كذلك نفسك لو مدتهاش اهتمام وتركيز مش هتقدر تساعد نفسك ولا تقوم بمهامك 

9️⃣ قضاء الوقت في اللاشئ 

بتقضي ساعات طويلة علي وسائل التواصل بدون هدف 

أو ممكن تقضي ساعات طويلة 

بتتفرج علي مسلسل كل حلقاته ورا بعض وتخلص من ده تبدأ في ده 

بتشغل نفسك بس باللاشيء!

🔟 فقدان الإتصال بالمصدر

أي حاجة في إتجاه إنك تخرج للطبيعة و تكون مع نفسك و تتأمل 

أو إنك تصلي ركعتين بتركيز وخشوع

أي حاجة فيها إتصال بالله مابتقدرش تعملها 

فقدان القدرة علي استشعار معية الله أو الاتصال بيه معناه إن في حاجة مش مظبوطة جواك محتاج تنتبه ليها ...

   الحزن صدأ يغشي النفس فلا تجعل الحزن يقتات على قلبك ويطفئ وهج الحياة في روحك ... قاوم لا تنطفئ