المقالات

الحب كده

الحاجات الي تقول وتضمن انك في علاقة حب صحية

1.          الاعتراف بالغلط

لما تكون غلطان في حاجة قول انك غلطت وأعتذر سواء لولادك أو لشريك الحياة أو لأصحابك

بلاش حالة الرفض والإنكار الي بتبقى عندنا

أنا ماغلطتش أنا ماعملتش

لو غلطان قول انك غلطان وعملت ده بقصد ولا بدون قصد

ده بيرفع قيمتنا جدا عند الطرف التاني وبيخلي العلاقة رايحة جاية بشكل صحي

2.          حسن استماع

الطرف التاني سواء ولادك أو شريك حياتك أو أي حد قريب منك بيبقي محتاج يتسمع

ماتقولش ما أنا لو كلامي بيتسمع مكنش حصل كذا

هو عاوز يتسمع وبس

مش عاوز نصح

تسمعي باهتمام وابتسامة

لو هو عاوز نصيحة أو حاجة نبدأ نساله طب أنت رأيك ايه طب أنت تقترح ايه الحل

طب أنت عاوز تسمع مني حل ولا محتاج مني ايه؟

3.           قبول الموافقة والرفض

 رايحة جاية بينك و بين الطرف التاني

في تقبل ان أي طلب يحتمل ال اه و يحتمل ال لا وان يكون مقبول ان مش كل حاجة بتمشي على الطريق المستقيم وطبيعي يكون في حاجات الطرف التاني هيرفضها لاي سبب 

4.          قادر تكون نفسك

انك تكون في العلاقة على طبيعتك وده ضروري جدا بذات في بداية العلاقة لان ان كل طرف يتصنع في بداية العلاقة ده بيعلي التوقعات جدا

فلما بيبدأ يبان عيوب بتتصدم في العلاقة

فمهم كده تتعامل بطبيعتك وتظهر بعيوبك ومميزاتك

5.          الوضوح والنقاش

لو أي طرف من الطرفين دخل في علاقات قبل كدة وفشلت غصب عنه مع وجود تشابه بيبدأ عقله يجيب الملفات القديمة ويفتحها ..

يعني مثلا حد من الطرفين أتعرض للخيانة قبل كده فمع وجود أي تشابه في الأحداث انه مثلا مش بيرد أو قال هينام و شافته أونلاين

بتبدأ تشك وتتخانق وتقيس على العلاقة القديمة

فمهم جدا يكون في وضوح ونقاش ولو في أي خاطرة أو قلق بقى جواك تقوله وتتكلم فيه وبالتالي يبقي في تفاهم

6.          الحب معناه ال أنا عايزاه + ال أنت عايزه

يني لازم العلاقة يكون فيها حل وسط واحتياجات ورغبات الطرفين متشافه ومتقدره

ماينفعش يكون طرف شايف انه عايز حاجة ومحمل الطرف التاني انه ينفذها باي شكل و باي طريقة حتى لو مش مريحاه

ومهم جدا ان كل طرف يعمل اللي هو عايزه من غير ما يجي على الطرف التاني

دي مؤشرات ان العلاقة دي علاقة حب جميلة وسهلة وصحية