المقالات

تدي لنفسك كام من 10 في تدميرك لعلاقاتك؟! 

10 تصرفات بتخلينا نخسر العلاقات 

البنى صعب مش سهل لكن الهدم بيحصل في لحظة.. 

وكام حد كان في علاقة وفجأه اتهدمت بسبب حاجات احنا بنعملها! 

✔️ تجنب سؤال الأسئلة المهمه 

الأسئلة المصيريه اللي بتخلي العلاقه دي تمشي بشكل لطيف وصحي 

سمعت مثلا ان حد اتكلم عليك بشكل ما 

وأنت مش بالع الموضوع 

وبتقرر انه خلاص انت مش هتتكلم ومش هتقول حاجة لكن بتتعامل وانت مضايق ومش طايق 

فلو محتاج هنا تسأل وتواجه و تسأل عشان تفهم مهم جداً انك تعمل ده عشان مايفضلش الموقف ده محطوط وتفضل شايله في قلبك وبتتعامل وأنت شايل 

عشان قررت انك تتجنب المواجهه و السؤال لأسباب معينه في دماغك فعلى اساسه انت كده بتاخد العلاقة دي للتدمير.. 

✔️ عدم التركيز داخل العلاقة 

بتتكلم دايماً وأنت مش مركز بتبص في اتجاهات تانيه 

مفيش حضور كامل.. عدم الانتباه والتركيز ده ببضايق الناس 

وبيدي شعور فورا إن الشخص ده مالهوش قيمة عندك أو ان الحاجة اللي أنت مشغول بيها دي ليها قيمه عنه.. 

✔️الدفاع 

بمجرد ما يكون في محاولة للعتاب أو مواجهه من الطرف التاني ليك

قبل ما اللي قدامك يكمل الجملة 

بتتعصب و بتغضب وبتزيد علي الطرف التاني عشان هو مش مسموح باي شكل انه يغلطك 

مابتتقبلش اي نقد أو اي كلام سلبي 

فده ممكن يخسرك علاقات كتير كان ممكن تكون من أفضل العلاقات في حياتك أو من أفضل الناس اللي بتتعامل معاهم.. 

✔️النقد 

طول الوقت لوم أو نقد على اي حاجة ولاي سبب 

فاللوم الزايد بالوقت بيخلي الطرف التاني دفاعي 

والتركيز علي العيوب في العلاقة بيخلي العيوب تظهر وعلي اساسه بتخسر العلاقة.. 

✔️ شايف الطرف التاني ملاك بتتعامل معاه على انه مابيغلطش 

فعلي اساسه بتتعامل طول الوقت على انه

ماينفعش يصدر منه العيبه 

وطبعا ده مستحيل لاننا بشر كلنا بنغلط و بنسئ التصرف 

فانك تحط الطرف التاني في اطار انه ما بيغلطش فلو غلط تتصدم و ينزل من نظرك 

وبالتالي تخسر علاقتك بيه 

✔️ ignore your past

اللي حصل في الماضي كويس أو وحش هو اللي شكلك كإنسان 

واللي بيتعامل معاك لازم يكون قابلك بحلوك ووحشك 

وماينفعش وأنت بتتكلم تتجنب اللي عشته ومتحاولش تعالجه 

يعني لو كنت في علاقة مع شخصية نرجسية لازم بعد ما تخرج من العلاقة دي  تروح لمختص يساعدك علي تجاوز الأثر اللي موجود فيك بسبب العلاقة دي عشان ماتفضلش تعمل اسقطات علي العلاقة الجديدة بناء علي ألمك من العلاقة القديمة فتخسرها.. 

✔️ الخداع

انك بتتعامل بشكل مع الطرف التاني وأنت جواك حاجة تانيه 

بتبدأ بنيه معينه أو علي أساس معين وأنت جواك عايز حاجة تانيه 

فعلى أساسه الطرف التاني بيفهم ده فبيفوت مرة واتنين وتلاته وبعدين بيتخنق ويبعد.. 

✔️ مين الصح ومين الغلط 

كل طرف شايف نفسه صح والتاني هو اللي غلط 

والعلاقات مابتمشيش كده 

العلاقات بتمشي باننا نشوف حل وسط 

تتغافل مرة وتفوت مرة و تقف مرة يكون في تعامل وسطي مريح.. 

✔️المعايرة والتقليل

بتعاير الطرف التاني بغلطه قديمه وقع فيها 

في كل موقف تجيب اللي فات وتقول مش كفايه اني سكت في الموقف الفلاني أو اني سكت لما عرفت عنك الحاجة الفلانيه 

أوانك تتريق عليه قدام الناس و تقلل منه وانك دايماً بتحسسه بالخزي وانه قليل 

دي حاجات هيقبلها كام مرة وبعدين هيقف عليها ومش هيعديها وهتخسر العلاقة 

انا لما بشوف حد بيقلل من حد بستنقص اللي بيقلل مش اللي اتقلل منه 

مش مسموح ان حد يقلل من حد باي شكل ولاي سبب 

✔️ التوقعات المرتفعه 

متوقع من الطرف التاني حاجات خياليه 

ما أنت لو مهتم كنت عرفت لوحدك 

أنا عايز حد يفهمني من غير ما أتكلم 

حاجات خياليه بتفتزضها وراسمها في دماغك وبتعامل الطرف التاني بيها 

لازم تتقبل ان الطرف التاني ده في عيوب زي ما في مميزات 

ويكون احتياجاتك وطلباتك في العلاقة منطقيه