المقالات

مشاعرنا عايزة تقولنا إيه؟!

المشاعر رسائل

والنضج النفسي هو تتقلّص مساحة مسئولية الآخرين عن مشاعرك في مُقابل اتّساع نصيبك منها

تشوف الظروف والأحداث كإنها مرايه بـ تظهرلك مواطن توترك وضعفك وأماكن الألم المدفونة

 اللي الموقف أو الشخص لمسها وخلت ثباتك يختل!

المشاعر فرصة بتخليك تستخدم كل ما هو خارجي لكشف ما هو مخبوء بداخلك..

إنك تتعامل مع نفسك إنك صورة غير مكتملة والمشاعر والأحداث اللي بتمر بيها بـ تكملك أجزاء الأحجية

أنصاف القرارات و أنصاف العلاقات و أنصاف المشاعر.. كل ده أذية ووجع بـ إختيارك وبكامل إرادتك وأنت مش حاسس

مُهم تعيش مشاعرك بشكل كامل وتفهم رسالتها

◾مشاعر السعادة

إنك تبقي مبسوط وراضي

مشاعر السعادة بـ تيجي اساسا من مشاعر الأمان والاطمئنان اللي بـ تبقى جواك من صغرك

كل حد مننا في حاجات معينة هي اللي بتوصله الشعور بالسعادة

فمهم تعرف إيه الحاجات اللي لما بـ تحصل بتخليك سعيد

وإيه الاسباب اللي بتوصلك للسعادة؟

حياتك من صنع أفكارك سعادة الإنسان أو شقاوته أو قلقه أو سكينته تنبع من نفسه وحدها.

◾مشاعر الحزن

دايمًا بشوف الحزن عامل زي نضارة النظر اللي بتحسن الرؤية

الحزن بيجي بعد ما تخسر حاجة أو حد مهم بالنسبالك

ومهم إنك تعيشها وتفهم هي جايه تقولك إيه؟!

لإن الحزن بـ يكشفلك مواطن قوتك وضعفك بـ يخليك تشوف الناس والأحداث بعين مختلفة

بيخليك تعرف أكتر مقدار النِعم الموجودة في حياتك واللي ممكن ماكنتش واخد بالك منها مع زحمة الدنيا

بـ يعلمك تكون أكثر صمود وبـ يخليك تتعلم من غلطاتك وماتكررهاش

لو فعّلته بشكل صحيح عشان تفهم رسالته مش إنك سبت نفسك تعيش مشاعر الهدم بس من غير ما تفهم الدرس..

◾مشاعر الترقب

هي عاطفة تنطوي على المتعة أو القلق عند التفكير في حدث مُتوقع أو مُنتظر

القلق والانتظار اللي بنعيشه قبل الامتحان أو قبل مقابلة مهمه في حياتنا

مش سهل في الأوقات دي اننا نركز على الإحساس الإيجابي لان القلق في اساسه مشاعر سلبيه

لكن اتعلم تاخد المشاعر دي وتستخدمها لصالحك هيخلي إحساسك بيها وبالموقف اللي بتمر بيه مختلف

المستقبل مش مضمون والتحكم في النتايج مش تحت سيطرتنا دايمًا

فلازم تعرف ان مشاعر الترقب بتحضرك للمستقبل بتخليك تستعد بشكل كويس

بـ يعلمك تتكيف أفضل مع التحديات وتخطط للي جاي بشكل أفضل..

◾مشاعر الخوف

شعور بـ يحصل مع احساس بالخطر أو التهديد

الخوف رغم انه شعور يبدو سلبي إلا أنه ضروري جداً في حياتنا

لإنه بيعلمك تحمي نفسك عشان تكون في أمان

بشرط انه يفعل بشكل متزن بلا إفراط ولا تفريط

مشاعر الخوف لو حاولنا نشوف رسالتها

بيجلنا مشاعر خوف لما نكون هنعمل حاجة غلط فنقف ونفكر مرتين أو نوقف ومانعملهاش

خوفك علي ولادك وحبايبك هيخليك تدرك أهميتهم وتعاملهم بشكل يحافظ عليهم في حياتك

المهم ماتسمحش للخوف يكون سجنك

الناس من خوف الذل في ذل...

الخوف من الموت.. موتُ قد يمتدّ مدى الحياة

وهل الخوف من الحاجة إلا الحاجة بعينها! 

◾مشاعر الوحدة

من أصعب المشاعر اللي بنمر بيها شعور إنك وحيد إن مافيش حد يقولك أنت ماشي صح ولا غلط!

مافيش قلب يخاف عليك أو حد يسمعك بصدق ومحبة

مافيش حد مؤمن بيك وبقدراتك

واحنا كبشر من أهم احتياجتنا الأساسيه 

إننا بنحتاج ونس وصُحبة وبنحتاج وجود ناس حلوة في حياتنا

وعشان تتجنب الوحدة 

مهم تستثمر في علاقاتك لان ده اللي بيبعدك عن مشاعر الوحدة

 إنك تكون بالفعل وسط مجتمع داعم وحواليك علاقات حقيقية مُريحة ومسبق بالخير والدعم...

وتبقى أهم وأصدق المشاعر هي حاجتنا لله ..لقربة ورحمته ولطفه ومعيته

العُسر في كنفه يتيسر والكسر بقربة يُجبر.. والخوف بمعرفته يسكُن

"ما خاب من أودع الله شتات أمره"

وأنت في طريقك لا تجعل همك الوحيد أن تصل

عِش دهشة التجربة، ورهبة الاكتشاف، ومتعة المغامرة، ومشاعر الترقب..

الجميع سيصِل.. ولكن البعض سيحمل معه تفاصيل رحلة جميلة، وذكريات ممتعة، وأحداث لا تُنسى..

اسمح لنفسك أن تعيش الحياة بكل تفاصيلها..

إزاي بتفهموا الرسايل اللي ورا مشاعركم؟

وإزاي بتقدروا تستخدموها لصالحكم؟