8 خطوات للتخلص من الذكريات المؤلمة

آلام وجروح الماضي شيلة تقيله شايلها وبـ تتحرك بيها

الإساءات بـ تحفر في القلب شقوق وجروح عميقة ...

والتداوي بـ يبدأ لما تبدأ تنتبه للجرح اللي جواك وتعالجه وترويه بالحب

التعافي بـ يبدأ بانك تسامح نفسك وترحمها..

فكرة التعافي من آثار التشوّه النَّفسي وتجاوز الفشل والفقد فكرة مش سهلة ومحتاجه عزيمة وقوة وثبات ويقين

جدد نيتك وأبدأ خد خطوة عشان تعيش حياتك بشكل صح يليق بيك

الماضي واللي حصل فيه كنت مُرغم عليه لكن التعافي منه اختيارك..

8 خطوات هتساعدك على التعافي من الذكريات المؤلمة

ü  لا تتعامل بخبرات الألم

الوجع اللي مريت بيه مخليك ماشي

بتعلّم على غلطات الناس ومستنينهم يغلطوا ومتوقع الأسوأ دايمًا ولما بيحصل بتقول اهه حصل

طب ما أنت اللي مستنيه!

"كل متوقع آت"

لو جواك جروح من علاقات قديمة حاول تعالجها عشان ماتدفعش حد تاني فاتورة مش بـ تاعته وتحاسبه على خوفك من ألم وغلطات عشتها في تجارب تانية..

ü  اتعامل مع الحياة بمرونة وتقبّل

محتاج تسيب مساحه للأخطاء

احنا بشر وبـ نغلط عادي كلنا بلا استثناء بنقع في الغلط

عادي إنك تقول أنا غلطت في التصرف ده وأنا اسف

الغلط ده بـ يحصل عشان تتعلم منه درس مش عشان تفضل تكرره

وتقبّل إنها دنيا كل حاجة محتاجة وقت وجهد عشان تقدر توصلها

ما تنتظرش نتايج سريعة لمحاولتك في التعافي ادي لنفسك وقت علي ما يحصل نتيجة للسعي والخطوات اللي مشيت فيها

ü  تحمل مسؤولية أخطائك

المشكلة اللي بين طرفين

دايمًا بنشوف ان طرف ملاك وطرف شرير

جاني ومجني عليه

طب حط نفسك مكان الجاني

عشان تقدر تشوف الصورة كاملة

لما تشوف الموضوع بنظرة من بره هتقدر تعرف أخطائك أنت كمان في اللي حصل احنا دايما ماسكين في وجهة نظرنا وشايفين عيوب الطرف التاني كويس

لما تقدر تشوف مسؤوليتك في المشكلة ده بيقلل حدة الغضب وقتها ممكن تقدر تسامح أو على أقل تقدير تساعد نفسك تتجاوز المشكلة وماتفضلش ماسكها في ايدك زي حتة الفحم المولعة اللي مابتحرقش حد غيرك وموقفة حياتك وممكن يكون الطرف التاني عايش حياته وناسيك أصلاً

آن الآوان ان كمان ترمي اللي حصل ورا ضهرك وتكمل خفيف ومرتاح

مستحيل أن تغيّر الماضي لإنه ماضٍ..

لكن...يمكنك أن تتعلم منه؛ حتى لا تكرر ذات الخطأ...

ü  اقبل اللي مش قادرة تغيره

السخط اللي بـ يحصل على حاجات مستحيل تتغير

بـ تسأل تساؤلات وجودية عن حاجات مش تحت سيطرتك أصلاً

بلاش تعيّش نفسك في دور الضحية

اللي حصل حصل

الألم ممكن يكون مش مسؤوليتك لكن علاجه وتجاوزه والتعافي منه مسؤوليتك

ü  حرر مشاعرك..

اسمح لنفسك تعيط لما تكون محتاج ده

احنا كائن شعوري كلنا جوانا مشاعر محتاجين نحررها

كتم المشاعر مؤذي وقاسي

المشاعر موجودة عشان تُفعّل ونتعلم منها ونستفيد من رسالتها

حجم مشاعر الحزن في العادة بيكون مساويًا لحجم الخسارة... اختبر هذه المشاعر ولكن لا تسكن هناك...

ü  اعتنق العقلانية

ربنا مدينا عقل وقلب ولسان

عشان نفكر ونحس ونتعامل صح

ادعي ربنا يرزقك قلب سليم ونضف قلبك من الحقد ومن الحسد ومن الرياء

عشان تقدر تاخد نية حقيقية سليمة إنك هتتعافى من الماضي بالاستعانة بالله

وبعدين العقل بقي يحسب حسبته

بالإدراك والفهم والمعرفة واتخاذ قرارتها حقيقية بالإصلاح والتعلم من الأخطاء وتجاوز الصدمات

ü  تجديد الأفكار

كلنا عندنا أفكار سلبية متخزنة من التجارب والخبرات القديمة وتشوهات معرفية

وبنصحى يوميًا نضيف عليها أفكار سلبية من نظرتنا وتعاملاتنا كل يوم

بنسيب النِعم الكتير اللي حوالينا ودايمًا دماغنا مركز على الحتة المفقودة والألم اللي حصل

فمحتاج تستبدل ده

بالتركيز على الحاجة الحلوة وتكبرها وتعيش فيها وتستمتع بيها ببساطة

محتاج تفعّل #الإمتنان في حياتك

محتاج تقدّر كام نعمة في حياتك لو اتحطيت في اختيار بين إنك تفقدها وتأخذ ملايين من الفلوس هترفض

طب ليه مش مقدّر قيمتهم حالاً

ليه عايش منكد على نفسك وعليهم

ليه مابتستمتعش بنعمك وسايب رصيد أيامك معاهم يخلص في نكد أو حزن أو إهمال

بلاش تستنى لما تفوق بعد فوات الآوان 

ü  بلاش تاخد الدنيا جد

وبلاش تدي الدنيا أكبر من حجمها

بلاش اللي حصل يوقفلك حياتك

الفلوس اللي راحت تقدر تعمل غيرها

والصحبة اللي خسرتها تقدر تكوّن صحبة غيرها

ربنا رزقك في حياتك بيوم جديد كل يوم

ليه ماتحاولش تعمل حاجة جديدة

وتفكر أفكار جديدة

وتكون أنفع لنفسك ولغيرك.. ماتخليش حياتك مجرد يوم بيتكرر

هي حياة واحدة فحاول تعيشها صح..

راقب أفكارك لأنها ستصبح كلمات.. راقب كلماتك لأتها ستتحول إلى أفعال.. راقب أفعالك لأنها ستتحول عادات.. راقب عاداتك لأنها تكون شخصيتك.. راقب شخصيتك لأنها ستحدد مصيرك...

إيه الخطوة اللي هتبدأو في تطبيقها للتعافي من آثار الماضي؟