المقالات

عمرنا ما كنا نتصور ان الحل عندها! 

انتوا عارفين ان الحاجة اللي احنا مُستبعدينها

أو الحل اللي احنا مُستبعدينه

أو الحد اللي احنا مُستبعدينه

ممكن يكون هو اللي الحل الوحيد عنده .. 

والدي توفاه الله من 5 سنين

و في فترة تعبه كان عنده فشل كلوي وبالتالي بيغسل كلى مرتين في الاسبوع لمدة سنتين 

خلال السنتين كان المسؤول عنه ممرضة جميلة قوي وطيبة وبنت حلال

وهو كان مهتم بيها جدا ولازم يجيبلها شوكلاته وهو رايح واي مناسبات يعزمها

وكنا نستغرب انه مهتم بيها قوي كده.. 

ومن حوالي 3 سنين 

في حد في العائلة كان تعبان ومحتاج يغسل كلى فورا ومُتعثر مادياً بشكل ما 

ويتصلوا بكذا مستشفي يتقال مفيش مكان 

وهو كان عنده مشاكل صحية كتير ومفيش اي مجال للتأجيل 

المهم حاولنا نتصل بكل معارف والدي الله يرحمه الي ممكن يساعدونا

وكل الي نقدر نقول انهم الكبار أو في منصب

قدّر ربنا ان منهم الي تليفون مقفول منهم الي مش بيرد وهكذا 

ف حد قال طب ما تتصلوا بفلانه.. 

اللي هي الممرضة الجميلة الي كانت مسؤوله عن والدي في فترة تعبه 

لما اتصلنا بيها الموضوع أتحل في ثانية 🤍

السرير اتوجد وغسل الكلي أتوجد

وبدون اي مصاريف.. 

وكان ردها ان ده محبة في أبويا رحمة الله عليه🤍 

ومن وجهة نظرها شايفة ان ده رد لجمايله

الي هو مكنش شايف انها جمايل ولا حاجة

وهي شايفة ان من أثره و محبتها له بترد لحد هو معدش موجود أصلاً في الدنيا.. 

وقتها فكرت هو يا ترى كان عارف وهو بيعاملها كدة او بيتعامل معاها بالإحسان وبالمحبّة دي 

ان ده هيتردله بعد وفاته في أهل بيته وأولاده 🤍

عشان كدة لما حد بيقولي الناس ماتستهلش

والواحد بيُحسن و بيتعامل كويس والناس ما بتقدرش

كان بيجي في بالي أبويا 

واني أتعلمت بسببه ان كل آثارنا مكتوبة 

كل خطوة للخير وكل كلمة كان ليها صدى حلو جوه القلوب

 كل فكرة نورت عقل حد 

كل حاجة بتعملها بيفضل أثرها في حياتك وبعد مماتك 🤍👣

وبيجي ناس بعد الوفاة بسنين عشان يأكدولنا ان الأثر باقي زي الممرضة الجميلة دي 

اللي حلت مشكلة كانت أزمة كبيرة جداً وقتها.. 

ف يا ترى الحد أو الحاجة الي هي أكتر حاجة احنا مُستبعدينها

ممكن يكون هي الي فيها الحل

ممكن يكون الحل في ركعتين قيام ليل

ممكن يكون الحل في اني افتح المصحف أقرأ فيه

ممكن يكون الحل اني ادعي دعوة بمناجاه وعياط من قلبي

ممكن يكون الحل في كلام ومناقشة مع شخص مُستبعداه بس لما تكلمه يديك الحل.. 

ممكن يكون الحل..

هو مش ممكن هو الأكيد وعن تجربة ان الحل بيبقى مع الحد الي احنا في الأغلب مُستبعدينه.. 

الحلول الصغيرة القريبة البسيطة السهلة

الي مش هتاخد ولا وقت ولا مجهود ولا فلوس

ولا تعب ولا اي حاجة

في الأغلب بيبقى هي دي الي فيها الحل 🤍 

قولولي كده لو حاجة نورت في دماغكوا؟

غير ان أكتر حد مُستبعدينه أو أكتر حاجة مُستبعدينها بتبقى هي الي فيها الإجابة..