المقالات

مين الصادق ومين الكذاب

النظرة من زاوية واحدة قاصرة وقد تكون مضللة

كتير شوفنا المشهد ده وممكن نكون أحنا نفسنا اتحطينا فيه

قصة بتتحكي من شخص عن شخص  بأسلوب ورواية محبوكة تمامًا

بتتلخبط وبنتحط في موضع يا ترى مين فيهم الصادق ومين الكذاب

غالبا الي بيعرف يحكي قصته بشكل أفضل الناس بتصدقه

في قصة سيدنا يوسف مع امرأة العزيز

هي كانت حابكة القصة تمامًا

"وَاسْتَبَقَا الْبَابَ وَقَدَّتْ قَمِيصَهُ مِنْ دُبُرٍ وَأَلْفَيَا سَيِّدَهَا لَدَى الْبَابِ قَالَتْ مَا جَزَاءُ مَنْ أَرَادَ بِأَهْلِكَ سُوءًا إِلا أَنْ يُسْجَنَ أَوْ عَذَابٌ أَلِيمٌ"

كانت مش بس بترمي علي سيدنا يوسف تهمه مش بتاعته لا وبتحدد العقاب

"قَال هِيَ رَاوَدَتْنِي عَن نَّفْسِي"

الرواية مختلفة وغالبا الظالم بيكون قادر يمكر و يخطط و يحبك خطته

وربنا حطلنا القاعدة بس ليه مش بنطبقها؟!

" يَا أَيُّهَا الَّذِينَ آمَنُوا إِنْ جَاءَكُمْ فَاسِقٌ بِنَبَإٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ"

ده احنا مش بس بنصدق ونكذب الناس وبنحكم عليهم من رواية من طرف واحد

احنا احيانا بنصدقهم و بنكذبهم بينا و بين نفسنا

بنفسر تفسير لتصرفاتهم و افكارهم ومشاعرهم ونحكم عليهم ونعاملهم علي أساسه

من غير ما نتبين

من غير ما نروح نقول والله انا حسيت كذا في الموقف الفلاني

أو كنتِ تقصدي كذا في الموقف ده ليه

القاعدة مش في الرواية بين الشخصين

احيانا بكون أنا الشخص الي بيضلل نفسه بنفسه

عشان برده مبطبقش القاعدة "فتبينوا"

"إِنَّمَا أَنَا بشَرٌ، وَإِنَّكُمْ تَخْتَصِمُونَ إِلَيَّ، وَلَعَلَّ بَعْضَكُمْ أَنْ يَكُونَ أَلْحَنَ بحُجَّتِهِ مِنْ بَعْضٍ؛ فأَقْضِي لَهُ بِنحْوِ مَا أَسْمَعُ، فَمَنْ قَضَيْتُ لَهُ بحَقِّ أَخِيهِ فَإِنَّمَا أَقْطَعُ لَهُ قِطْعَةً مِنَ النَّار"