اوعي وأنت بتحاسب نفسك تكسرها
اوعى وانت بتحاسب نفسك تكسرها
جلد الذات هو تفكير ومشاعر سلبية فيها نقد دائم للنفس وتحسر على الماضي
الفرق بين جلد الذات ومحاسبة النفس
وازاي نبعد عن جلد الذات ونوصل لمحاسبة النفس بشكل صحيح؟!
مش دايما لو هي البديل الصحيح
لو مكنتش عملت كذا مكنش حصل كذا
لو مكنتش قولت الكلمة الفلانية مكنش هيحصل كذا
جلد الذات هو شخص عايش أسير الماضي
عايش في موقف حصل أو حاجة حصلت في الماضي و مش عارف يطلع منها ومش عارف يركز في الحاضر
وعلي اساسه بيحصله احباط من الناس الي حواليه فبيبدأ يعتزلهم لفترة او اعتزال كامل
جلد الذات ممكن يجي في البعد عن الناجحين
لو لقيت حد من اصحابي نجح وبقي في مركز مرموق وانا لا
فابدأ أقول أصل أنا فاشل
أصل أنا عارف ان أنا طول عمري مش نافع
فبيبقي ناتج من إن ناس من المقريين حققوا نجاحات وأنا لا
تفكير زايد عن اللزوم قبل النوم في الماضي
فانام نوم في قلق
ولما أنام اصحي في النص ولو حلمت بحلم
بحلم بردّ كان المفروض أرده أو حاجات كان المفروض أعملها أو معملتهاش
سبب جلد الذات
◻️ إننا نكون محققناش في حياتنا نجاحات في حاجات معينه أو في علاقات معينه
أو في أكتر من تجربة فاشلة متتالية
فده بيأثر علي ثقتي بنفسي وبيخليني
أحس إني فاشلة و في حاجة غلط
فعلي أساسه ببدأ أجلد في ذاتي
◻️ نقد سلبي دائم ومتكرر من الي حواليه وخصوصا من الدايرة القريبة
◻️ التربية باللوم و النقد و ان كل ما يحصل اي غلط و أنت صغير بتتحاسب انك الوحيد الي غلطان
وانت الوحيد الي بتشيل الليلة
◻️التقمص والتقليد
اني بقلد دايما الناس الي حواليه ودايما بصه للي حواليه وبقارن
أردت ان احاسب نفسي فكسرتها
⚫ لوم الذات ده من عدم النضوج
بصدر لنفسي طول الوقت أفكار سلبية عن نفسي في حاجات فاتت و مش في أيدي تغيرها
وبالتالي بهدم نفسي بنفسي
⚪ محاسبة النفس بتكون جاية عن نضوج
بحط خطة وببقى ماشي بخطوات تبعا للخطة
بكون متوقع إن هيحصل غلط
ولما يحصل بعرف الغلط فين وبصححه 👌
علاج جلد الذات
💠 تقبل أخطاء الماضي
الماضي حاجة راحت خلاص مش هنعرف نرجعلها
الي نقدر نعمله نستفيد من الخبرات الي حصلت في الماضي عشان نقدر نكمل في الحاضر وفي المستقبل
💠 التعلم من الأخطاء وعدم تكرارها
تكرار نفس الخطوات الغلط الي عملتها هتديني نفس النتيجة إن مكنش أسوء
لما أكرر جلد الذات و شغال طول اليوم شكوى و بكى علي حالي والي عملته والي وصلتله
من غير ما يكون عندنا قدرة علي التعامل مع التحديات اليومية
مش بحاول أتعلم عن نفسي وافهم الأسباب الي خلتني أتصرف بشكل غلط
و أعرف عن نفسي أكتر وأفهم ازاي أطور منها
💠 تفعيل عادات إيجابية بشكل يومي
لو بدأت أفعّل عادات إيجابية و أخد خطوات إيجابية ده بيتعارض مع لوم النفس
لإن لوم النفس عن حاجة في الماضي
فلما أركز علي عادات إيجابية في الحاضر كل ما ركزت علي الحاضر كل ما عقلي بعد عن الماضي وبالتالي لوم النفس هيقل تماماً لحد ما يختفي..
💠 زيادة الثقة في النفس
لما أمارس عادات إيجادبية ده هيرفع من ثقتي في نفسي لان ده هيخلي عندي نجاحات
وهيخلي عندي ثقه اكتر في افكاري و في قرارتي
وثقل وحكمة في إدارة أموري
وكل ما ثقتي في نفسي زادت كل ما جلد الذات قل
💠 تقبل بشريتي
ان عشان احنا بشر لازم هنغلط ربنا خلقنا بنغلط و بنتعلم
ومش أنا الوحيد الي بعمل ده كلنا بنغلط مش حاجة بنفتخر بيها لا بنحاسب نفسنا علي الغلط و بنصححه بس في نفس الوقت بنتقبل بشريتنا
مهم ان احنا لما نغلط نقفش الغلط ده ونحاول نصححه ونظبطه عشان منكررهوش تاني
💠 اختيار محيطك وصُحبتك
الناس الي حوالينا مؤثرين جداً علي شخصيتنا وردود أفعالنا
نحاول نختار الناس الي حوالينا
في منهم المثقف
في منهم الشخص المتفائل الإيجابي
في منهم الي أقدر أستعين بيه أو أستشيره في حاجة
💠معرفة نقاط قوتي
من منظور علم النفس الإيجابي كل شخص عنده 24 نقطة قوة
معرفة نقاط قوتي وتفعيلها وفهم شخصيتي اكتر
افتكر نجاحاتي وأعرف أنا كنت مفعله أنهى نقطة قوة
كل ما انا بعمل الخطوات دي كل ما بيبعدني كتير عن جلد الذات
"بَعْد سَنَوات مِن جِلْد الذَّات تُدْرِك أَنَّك لَسْت شَيْطان وَأنَّك لَم تَكُن سُوَا إِنسَان طَبيعِي اِرتكَب بَعْض الأخْطاء وان ذَلِك الالْتزام الأخْلاقيِّ الكامل اَلذِي تمَّ التَّرْويج لَه كشيْء قَابِل لِلتَّطْبيق بل وَسهَّل اَلوُصول إِلَيه لَيْس سُوَا مُجرَّد وَهْم وان المطْلوب مِنْك فقط أن يَكُون لَديْك نِيَّة صَادِقة بِعَدم إِيذَاء الآخرين وتعْمل دائمًا على ذَلِك "
الي بيفرق في اي عمل "النية"
لو بنشتغل دايما علي ان نيتنا تكون كويسة و أنا من جوايا مُستعينه بالله
وعارفة كويس قوي إني بحسن نيتي
ناحية نفسي وناحية الاخرين
حبوا نفسكوا زي ما بتحبوا أقرب حد ليكوا
نفسكوا أولى بالحب ده
أبنوا علاقة مع نفسكوا الأول
لازم أكون انا أولوية في حياتي
لازم أحب نفسي ومكسرهاش عشان تقدر تعيني علي اني اقدر اكمل
"رحم الله امرأ عرف قدر نفسه"
