المقالات

مش علشان خبير نتّبعه بدون تفكير

عارفين إن في فرق كبير بين إنك تتعلم من شخص وبين إنك تلغي عقلك وتكون تابع لتفكيره وعقله ومنطقه

بين إنك تثق في رأي شخص وفي شهادته

وبين إنك تلغي إعمال عقلك في كل الأمور وتمشي تبع رأيه وقرارته وأفكاره 

في قصة بتحكي عن أحد زعماء المافيا أكتشف إن المحاسب بتاعه اختلس منه عشرة مليون دولار ..

والمحاسب كان أصم وأبكم فطبعًا في صعوبة في التواصل معه ..

استدعى زعيم المافيا خبير في لغة الإشارة علشان يتواصل مع المحاسب ويعرف مكان الفلوس ..

طلب الزعيم من خبير لغة الاشارة يسأل المُحاسب هو خبى الفلوس فين ؟

فالمحاسب قال إنه مايعرفش حاجة عن الفلوس ..

غضب جدًا زعيم المافيا وطلع مسدسه ووجهه على رأس المحاسب وقال للخبير يقوله إنه لو ماعترفش بمكان الفلوس هيموته ..

لما الخبير وصل الكلام ده للمحاسب خاف وقال للخبير إن الفلوس موجودة في شنطة سوداء ورا المخزن ..

ولما الزعيم سأل الخبيرعن رد المحاسب

قاله:إنه بيقول إنك جبان ومش هتقدر تضربه بالنار ...

غضب الزعيم جدًا وضرب المحاسب بالنارفقتله ...

العبرة هنا إن الزعيم سلم عقله تمامًا لكلام الخبير ماحولش يفكر ولا يحط نسبة إن وارد يكون الكلام مش صح

ربنا أمرنا بإعمال عقلنا في كل الأمور 

"لا تكونوا إمعة "

ربنا خلق لنا عقل عشان نفكر بيه مش عشان نخليه تابع لعقل بشر تاني